【Now新聞台】歐國盃四強，意大利於溫布萊鬥西班牙，領先一球之下被追平，加時兩隊無紀錄，互射十二碼意大利贏4比2，取得決賽席位。
艾馬遜妙傳巴利拿入楔，推過出迎的門將施蒙，撬順右腳無人上前，隨即起腳射中遠柱彈出，這個時候才聽到球證笛聲，吹罰越位。
兩隊教練「肉緊」，皆因過往37次交手，大家各贏11次無優勢。
正選陣容收起摩拉達，西班牙排無鋒陣，令意大利更加難應付，今次埋門的是奧姆，當拿隆馬有反應。
上半場埋門是西班牙較多，但意大利攻勢更到肉，恩薛尼交給艾馬遜，窄位射中柱角彈出未能領先。
連續四屆歐國盃和西班牙相遇，西班牙贏得較多，包括2012年決賽4球大勝意大利，但上屆十六強贏2比0的意大利，憑一次反擊由基艾沙射入。
拉樸迪及時飛鏟阻止到恩姆比利，但基艾沙後上夠快，為意大利60分鐘取得領先優勢。
入球的基艾沙差點造出助攻，妙傳後備入替的比拉迪，過不到施蒙。
未能拉開還被西班牙追平，後備入替的摩拉達跟奧姆來個「撞牆」，再射地波入，是他今屆第三球，西班牙80分鐘追成1比1。
36歲的基亞連尼尾段禁區內落地攔截，手明顯碰到皮球，球證無吹罰亦無翻看重播，要加時分勝負。
基亞連尼加時下半場的長傳，接應的比拉迪轉身射破施蒙，但越位在先。
兩隊要互射十二碼，盧卡迪利射第一輪被施蒙捉路。但西班牙的奧姆和追平功臣射第四輪的摩拉達都不入。
過去5次於歐國盃互射十二碼，輸3次的意大利，緊隨佐真奴精彩而冷靜一腳，4比2淘汰西班牙，繼2012年之後再次躋身決賽。
