【Now新聞台】總結截至早上11點，1小時內《彭博》用戶關注度上升最多的港股，依次為，新世界發展、中遠海控、快手、安踏體育及京東健康。
新世界柏傲莊3期嘅兩座物業，因底座混凝土結構未達標而要拆卸重建。噚日消息一出，新世界已應聲下挫，收市跌近4%，今朝進一步受壓，一度低見36.2元，跌逾5.7%，跌至1個月低位。
大華繼顯執行董事梁偉源指，新世界股價由噚日至今已累跌咗8%，相信已反映咗事件嘅影響，而公司約12億元嘅額外賠償同建築成本，只佔每股資產淨值(NAV)5.6%，同稅後盈利差唔多，所以影響唔大。佢又話，新世界管理層今次對事件反應快，冇拖泥帶水，可以為公司中長線形象加分，佢相信新世界喺35元水平就可以喘定。
