【Now新聞台】截至早上11點止，《彭博》Top Search No.1為比亞迪股份，第2至第5位為新鴻基地產、小米集團、融創中國、騰訊控股。
上年新能源車補貼大削，導致電動車銷售急挫。不過，上星期工信部話，今年新能源車補貼唔會再減少。消息出咗後，比亞迪今日一度升11%，見近五個月高位，新能源汽車股會唔會進一步回升？
大華繼顯執行董事梁偉源表示，呢次政府公布新能源車補貼不再減少，反映咗政府希望促進新能源汽車銷售，特別係國產品牌正面對，已喺內地設廠嘅Tesla強大競爭。Steven又話，除咗政策面之外，比亞迪最近亦宣布研發「刀片電池」，性能同體積上都有好大進步，甚至比得上Tesla電池。喺雙重利好因素下，比亞迪股價估計有好大上升空間。不過，Tesla汽車最近都有減價，未來比亞迪新車型嘅銷售情況就要視乎定價。
