【Viu】古天樂、任達華、謝君豪、內地演員此沙、袁富華（Ben）、楊偉倫（阿卵）同Amy Lo盧慧敏等今日出席新片《偵戰》拜神儀式，三大影帝古仔、華哥同君豪哥合作，除咗打到飛起外，仲笑到爆嘴，席間君豪哥推介「平甩功」養生；華哥就hard sell每晚食兩粒健康食品，笑到古仔都讚叻呀！
講到《九龍城寨之圍城》已經衝破8千萬票房，榮登香港電影史上華語片票房第二名，古仔直言希望登上冠軍寶座，華哥同君豪都有買飛入場支持呀！佢仲話「前傳」同「終章」已經寫緊劇本，亦會加入新角色，仲講返喺康城影展點解眼濕濕添，風趣到爆！
至於Amy Lo首次擔任女主角緊張兼興奮，最開心係同一眾影帝有對手戲；此沙就大讚由細睇到大嘅影帝sss保養得宜，甚至比以前更型！此外，Ben哥同阿卵喺片中演探員，要畀人「探嚟探去」，搞到周身花晒，笑住爭做「探花」！想笑餐飽就睇足本訪問啦！
