【Viu】林家謙紅館個唱，本應休息兩日24號繼續on show，但當晚因為8號風球需要延期，噚日(25號)朝早個風走咗，第四場又可以順利開騷！呢晚繼續搵嚟Mami Serrini做嘉賓，你追我躲畫面又出演啦，家謙仲拎住條黑色羽毛同Serrini保持距離，真係笑死！合唱完一首歌，Serrini就趁機投訴俾家謙差別待遇，點知家謙突然語出驚人，爆Serrini今日嚟M，搞到Mami大嗌，話：「咁私人嘅事，梗係留返拍廣告嗰陣先講。」之後佢仲話其實私下同家謙感情唔多好，簡直係「相敬如嘉賓」咁話喎！
而當晚擔任嘉賓嘅，仲有岑寧兒、JW同許廷鏗，Alfred表示其實喺中學嗰時已經認識家謙，事關佢哋讀同一間中學，佢仲話2013年曾經收過家謙一首Demo，嗰時佢仲填咗一份詞，但可惜首歌冇正式面世，不過Alfred就話如果大家集氣，話唔定可以令首歌重新面世噃！大家識做啦！
