【Viu】由趙善恆（恆仔）自導自演嘅電影《一秒拳王》成功入圍「第40屆香港電影金像獎」角逐「新晉導演獎」，聽到呢個消息，佢完全意想不到，亦無諗過自己可以獲得金像獎提名。今屆金像獎角逐「新晉導演」獎戰況好激烈，恆仔對手有陳健朗嘅「手捲煙」、文念中嘅「好好拍電影」、劉浩良嘅「除暴」同李駿碩嘅「濁水漂流」，不過佢唔會當佢哋係競敵，反而會視為戰友夥伴，因為喺艱難底下仍然繼續拍電影。講到佢覺得邊位應得呢個獎，恆仔話：「我會揀文念中先生，佢從事好多年電影工作，都有好多厲害作品，而佢選擇做電影第一次作品係記錄許鞍華導演拍電影嘅一部電影。佢真係好愛電影，撇除所有任何層面考慮，都會係希望呢一個殊榮或獎項係可以交到畀一個好愛電影嘅人手上。」
雖然香港只係彈丸之地，但係電影業人才輩出，有唔少導演執導作品揚威海外。作為新晉導演嘅恆仔，原來佢最為欣賞係杜琪峯（杜Sir），因為覺得杜Sir好厲害，既有自己電影風格，無論拍商業電影、黑色電影、喜劇同愛情片都掂，任何戲種都拿捏得很好。
恆仔執導嘅電影《一秒拳王》已經贏盡口碑，將來繼續努力畀心機去拍戲，日積月累吸收唔同經驗，相信第時都可以好似杜sir變成多功能導演架！加油！
