【Viu】MC張天賦今日為婚紗展活動擔任表演嘉賓，大唱兩首hit歌《記憶棉》同《反對無效》，冧到在場班賦二代暈得一陣陣！席間率先自爆就快出浪漫情歌《老派約會之必要》，今次除咗有份作曲亦再次同Wyman合作，笑話係咁多首歌之中最具挑戰性，莫非比《小心地滑》仲難唱？MC解釋《老》係冇咁容易搵到唱法，咁就快啲推出畀大家評評理啦！
情歌就ready啦，咁有冇對象唱畀佢聽先？MC就自稱係single，因為依家太忙，同時自抽覺得好多人好驚同佢相處：「行個超級市場都好大件事，我諗另一半承受嘅壓力都好大～」擇偶首要條件係鍾意行超級市場？MC笑話唔係嘅，最緊要係相處、溝通到，其他條件就話唔埋。咁不如再講啲話得埋嘅話題啦，MC終極預告今個月內會公布演唱會詳情，係咪㗎？勾手指尾啦咁！
