【Viu】69歲「靚聲王」張偉文，今年2月喺所住嘅護老院感染新冠肺炎後被送到廣華醫院治療，留醫足足個幾月先康復出院。噚晚（9日）張偉文久休復出喺線上開騷，坐住輪椅現身精神唔錯，由監護人方俊陪住接受訪問。張偉文話最感動係得到各方幫助，仲喊咗兩次，「無論演員、導演佢哋好多人都幫助我、教我，我覺得好抵，令我知道唔可以忘懷，我好感動。初初（確診）頭一星期，我都好驚，個個講嘅版本都唔同，我都唔知相信邊個好？原來唔係好大件事。」
對於之前因疫情嚴峻而要延期舉行嘅兩場演唱會，方俊話7月會先復辦一場，「7月會先喺沙田大會堂唱一場，而原定元朗劇院取消咗嗰場因為未有場地，希望可以儘快同觀眾見面。今次真係好感動，大家都好撐偉文，冇人退飛，佢哋話揸住張飛，等幾耐都願意。」
目前住喺護老院嘅張偉文，要請假出嚟開騷，方俊話院舍好配合，因為張偉文要定期覆診、外出治療、工作等，院舍都會安排妥當。而停工多時，有冇經濟困難？張偉文話冇：「佢哋有經濟支援我，譬如我缺錢，佢哋會入一萬蚊去我戶口，好爽快。」好人一世平安呀！
