歌手Gin Lee（李幸倪）今年出道十周年，一眾歌迷特意舉辦應援展覽為佢慶祝，更偷偷聯絡Gin 媽媽，預先寫定一段感人說話送畀佢，令Gin一入場就忍不住標眼淚！
Gin Lee《Dreams Come True》十週年展覽定於11月11至14日舉行， 粉絲大曬珍藏品，展出Gin入行以嚟嘅專輯、海報、剪報、相集等等。展覽開幕第一日，Gin已經相約歌迷喺場地見面答謝大家，當佢見到粉絲準備嘅驚喜更即時感動到喊：「一入場就有咁大驚喜，估唔到媽媽寫咗一段咁感人嘅說話送畀我，原來呢十年有好多回憶，仲有見到好多唔同髮型、體型嘅自己，哈哈！」
粉絲除咗準備禮物同蛋糕，更用心製作短片送畀Gin ，其中一位粉絲將Gin歷年代表作用鋼琴彈奏，花上唔少時間編曲，串成一條8分鐘嘅medley影片，令Gin冧爆！佢向歌迷表示：「多謝你哋成為我回憶的一部分，希望嚟緊十年我哋一齊創造更多回憶，12月演唱會再見大家，期待到時同大家相聚。」
