C AllStar 7月完成紅館騷後，終於推出新歌《還有48小時》，如果世界剩返48個鐘，你會點過？今次MV導演依據4子嘅喜好選擇構思拍攝方向，造就咗C AllStar入行以嚟，最大尺度、最多攬攬錫錫場面嘅MV！
吳崇銘（King）希望有泳池、打碟機、同埋開party嘅感覺，所以導演安排4子喺一座擁有私人泳池嘅大宅拍MV，搵埋大班男女一齊狂歡，仲有Jase（何建曦）要求嘅美酒。身為大宅屋主嘅On仔（陳健安）為自己準備大量蛋捲，King則負責現場打碟，釗峰（梁釗峰）嘅要求最特別，就係需要好多好多愛！
為滿足釗峰要求，導演多次安排釗峰飛撲攬實其餘3位拍檔，再送上深情一吻。釗峰表示：「雖然開心玩為主，但因為得番48小時，背後其實件事好sad，我設定自己嘅角色係好想有好多愛包圍，所以我會好瘋狂地好hunger需要愛。」On仔接著回應：「釗峰終於說出重點，可能佢怕尷尬，等我幫佢講佢嘅要求，就係hug hug同Kiss kiss，其中三位男演員，仲要俾你kiss kiss唔同部位。」
眾人移師到屋外泳池繼續開P，King更即慶跑到離地約3米高嘅屋頂，一下跳落泳池，事後佢話：「以前我喺兩米跳台，跳10次都跳唔到落嚟，其實差唔多要跳嘅時候，我身體叫我停，但我用我嘅意志跳出去。」
C AllStar之後返到屋內浴室位置，準備玉帛相見，一齊浸泡泡浴。On仔同釗峰作為「肌肉擔當」，埋位前努力谷肌肉，Jase同King就一早走到浴缸浸浴，「我哋未試過有咁多肌膚之親，最親密只係幫對方按摩，私底下亦未試過一齊去游水，所以呢個MV，大家一定要留意。」
