ViuTV選秀節目《全民造星》系列捧紅過不少本土偶像,當中包括MIRROR、ERROR兩個當紅男團,正進行拍攝嘅全女班《全民造星IV》,將會選拔一隊全能女團,等有才能嘅女仔都可以實現舞台夢。今日節目舉行記者會,公布96強人選,當中包括多位《造星III》舊將、KOL同藝人細妹。
今日96強參賽者率先現身同傳媒見面,除咗有主持強尼,監製花姐(黃慧君)、女團經理人戴穎坐陣,仲請嚟導師許廷鏗、梁祖堯,評判當奴、鄭融同朱栢康出席,齊齊為節目造勢,分享各自嘅評分準則。另外,ViuTV董事兼總經理魯庭暉都有現身支持。
會上96位參賽者傾力唱跳,演繹全新編排嘅《造星》主題曲,以往以男仔為主嘅《前傳》終於有全女版,充滿新鮮感!
96強中不乏熟悉嘅面孔,包括幾位「星妹」,余香凝細妹余潔滢、193細妹郭嘉盈同歐陽巧瑩細妹歐陽巧琳,《造星III》參賽者方芷欣(方方)、夏子涓、蘇家欣(阿Bee)、鄭嘉欣(Christine)、周卓盈(Michow),另有《啱Channel》劉展翹(Jackie)、曾參加TVB《超級巨聲》嘅趙展彤等。
而原本被視為大熱嘅《100毛》利君牙、《試當真》阿慈同丁可欣(火雞姐)就未見入圍,有網友指可能因合約或檔期問題未能參賽。