0
0
〈娛樂乜乜乜〉做人唔睇化好難行落去

〈娛樂乜乜乜〉做人唔睇化好難行落去

【now.com娛樂】 睇完發嫂講自己當年BB夭折嘅訪問,個心好痛。BB差一個禮拜出世,新生命已走入大直路,本應係父母最期待嘅時候,但一個壞消息,臍帶纏頸,BB未嚟到呢個世界就走咗,呢個落差真係唔係咁容易承受。人越大越覺得做人好難,你永遠唔知個天幾時會俾嘢你,又會幾時攞走?佢俾啲咩你呢?又攞走啲咩呢?係咪等價呢?冇人知。唯一知道嘅係,做人就係咁㗎喇,一係唔好做,要做就要學識睇開啲啦,而其實大部分時間我哋都唔係睇開咗,而只係無可奈何地承受咗。

一個人嘅睇法係好緊要,強逼自己又好,搵個信仰又好,尋找人生意義又好,用時間淡忘又好,到最後你都要選擇睇化,因為唔化係行唔到落去。我哋見發哥發嫂幾十年都咁恩愛,笑面迎人,係唔會知道佢哋都有咁痛苦嘅過去,而又係點捱得過嘅。每人都有個故事,每人都受過苦難,磨難多嘅人承受能力強啲,人生順境多嘅人承受能力低啲,好難講邊種人生比較好,反正我哋只可以活自己嘅人生,比較其實好無謂,而且唔去到終點都唔知結論係乜。有時候睇其他人嘅經歷係有幫助嘅,唔係睇人衰自己會好過啲,而係學習點樣去evaluate一件事。

我都係小朋友嘅父母,完全想像到發哥發嫂當時嘅失望同傷痛。有邊個父母大肚時唔擔心?剛剛有咗,行步路都小心啲,食又唔敢亂食,連咁開心嘅事都唔敢同人講,驚BB小氣。其實呢個傳統智慧,我相信係驚父母小氣多啲,一個唔小心陀唔穩,但已經通知晒所有人,都唔知點樣在咁痛苦嘅時間又要同返大家講冇咗。到陀穩咗,就做好多檢查,其實都係擔心,唔知BB發育正唔正常呢?心臟健唔健康呢?夠唔夠重呢?活唔活躍呢?最驚都係check唐氏綜合症,因為太太剛好算高齡,話機率會比較高,已經淆淆哋,跟住加多句:「冇事就唔會打俾你㗎喇。」之後我同太太都驚咗部電話,驚佢會響呀!同時又要睇住啲營養,希望BB吸收得好啲,臨近預產期,又要擔心準備好未,走佬袋執齊未?如果早咗出世點算?陪月配唔配合到?天氣凍夠唔夠衫仔著?學識餵奶掃風換片沖涼未?所以點解BB嘅第一吓喊聲咁好聽,點解一聽就會感動落淚,係因為如釋重負呀,即使只係輕鬆得幾個鐘,到麻醉藥過咗又有幾十年要捱,但起碼最令人忐忑嘅第一關已經過咗。

而當小朋友慢慢長大,你會發覺小朋友點解唔夠人咁乖?或者唔及人咁叻?你緊張,你唔開心,但真係睇你點睇,因為退返去原點,原來小朋友可以出世可以長大已經係人生嘅恩賜,個天俾咗個小朋友你,而佢冇攞走到,就係幸運,因為佢真係可以好無情。陀BB時我唔係冇想像過如果BB夭折會點樣,係有輕輕地掂一掂,但冇勇氣深入去諗,因為唔覺得承受得到。我覺得學識感恩好重要,人要感恩自己擁有嘅嘢,因為世界上真係有人連擁有嘅機會都冇,但又活得比擁有嘅人更正面。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 【出境高峰】多個陸路口岸逼滿離境人潮 港珠澳金巴大排長龍
    【出境高峰】多個陸路口岸逼滿離境人潮 港珠澳金巴大排長龍
    2小時前
  2. 台北素食餐廳中毒案 第二名死者亦驗出米酵菌酸
    台北素食餐廳中毒案 第二名死者亦驗出米酵菌酸
    14分鐘前
  3. 小林製藥高層就服用紅麴保健品致死風波鞠躬道歉
    小林製藥高層就服用紅麴保健品致死風波鞠躬道歉
    16分鐘前
  4. 尖沙咀有商場推無消費免費泊車五小時吸客
    尖沙咀有商場推無消費免費泊車五小時吸客
    18分鐘前
  5. 兒子捲召妓醜聞 台防長邱國正請辭獲挽留
    兒子捲召妓醜聞 台防長邱國正請辭獲挽留
    19分鐘前
  6. 長假遠行 機場高鐵站逼滿人
    長假遠行 機場高鐵站逼滿人
    30分鐘前
  7. 【長假首日】港珠澳大橋搭金巴排三小時 羅湖落馬洲人頭湧湧
    【長假首日】港珠澳大橋搭金巴排三小時 羅湖落馬洲人頭湧湧
    34分鐘前
  8. 香港棍網球公開賽 港男女隊首戰報捷
    香港棍網球公開賽 港男女隊首戰報捷
    1小時前
  9. 職津金額4月1日起加15%
    職津金額4月1日起加15%
    1小時前
  10. 拜登與奧巴馬、克林頓同場 為競逐連任籌得逾二億港元
    拜登與奧巴馬、克林頓同場 為競逐連任籌得逾二億港元
    2小時前