【now.com娛樂】歌手陳慧敏外形細細粒，畀人感覺傻下傻下，最近佢將呢啲特徵融入音樂，推出最新個人專輯《一粒嘢》，嚟緊仲會開音樂會，主題係《我們叫傻瓜》。
「我們叫傻瓜嚟，全力笑甩你個下巴
好嗎 好嗎 來吧 哈哈哈哈
我做打工仔 搵錢有限 看別人車樓氾濫
我男朋友話我 似洗衫板
人咁誠懇真簡單 根本冇乜嘢要煩」
齋睇歌詞唔夠喉？咁就要CLICK條片聽聽慧敏哥親身演繹，佢呢日上嚟now.com接受訪問，講到新專輯點解叫《一粒嘢》，原來「一粒嘢」三個字對佢有好大感覺，細細粒嘅慧敏哥自言過去好介意別人話佢細粒，但在音樂路上，好多人會話「你細細粒，一個人揹住結他，行自己嘅路。」慧敏哥依家覺得「一粒嘢」反而係別人對佢讚賞嘅形容詞。
入行七年嘅慧敏哥，11月會喺旺角麥花臣場館舉行首個售票音樂會，著名演唱會監製康家俊擔任創作總監，RubberBand的阿偉擔任音樂總監。慧敏哥一班老友小肥、林欣彤、許廷鏗、鄧小巧、吳業坤等人，當然會瞓身撐。
慧敏哥希望透過呢個音樂會畀到大家一股傻勁，繼續做自己喜歡嘅事，有勇氣繼續行自己嘅路。
