【now.com娛樂】人紅自然是非多,特別係無啦啦爆紅嗰種,講緊吳京,《戰狼2》大陸票房仲升緊,已經去到45億,呢期傳媒唔寫佢是非仲等幾時先?真係幾陳年嘅往事都同你挖返出嚟,好似大陸傳媒就寫返十二年前《殺破狼》,話吳京「自己講」當年甄子丹睇佢唔起,狂cut佢戲份,連海報都唔想同佢一齊出現。報導仲話吳京好嬲,但「多謝當年佢睇自己唔起」,言下之意係受人白眼先會自強。呢啲咁戲劇嘅說話,咁juicy嘅經歷,肯定有人信,但我就好懷疑。
首先拍《殺破狼》時甄子丹都仲未爆紅,佢自己都係因為呢套戲先上到二線,之前都係配角多,最巴閉都係有份拍《英雄》,都唔係主角,一個唔紅嘅甄子丹打壓一個更加唔紅嘅吳京,我就唔信喇!然後,吳京默默捱咗咁多年,一朝成功,套戲都仲未落畫,會唔會喺呢個moment即刻醒起以前對佢唔好嘅人?你估佢被人虐待咩?男人老狗,發達第一時間梗係諗邊個對自己有恩,仲提十二年前被人cut戲份呢啲無聊嘢把鬼咩?
咁多年嚟,我唔知邊個對吳京唔住啦,佢咁少新聞,但對佢有恩嘅,一定唔可以唔提Paco黃栢高。Paco對吳京真係有情有義,想當年吳京係乜水?幾乎冇人知(就算直至今日都好多香港人唔識佢),但Paco好欣賞佢,拍《殺破狼》特登留個好角色俾佢,的確令人眼前一亮,咁都唔止,仲用自己公司名義開多部《黑拳》俾佢做第二男主角,戲份隨時多過主角鄭中基。自己開戲唔夠,Paco四圍落力推銷,仲開埋口話睇好吳京將來有李連杰咁勁,會入到荷里活,當然冇人會信啦,但俾面Paco而搵吳京演出嘅電影,的確唔少。得罪講句,直至《戰狼2》嘅上一集《戰狼》,吳京連半紅不黑都稱唔上,一個字:霉!但Paco從來冇放棄過佢,雖然佢搵唔到錢但仍然繼續幫佢推銷,守到金牌大風被收購,吳京先自己發展,但之後《殺破狼II》Paco都有預吳京一份。
呢種咁深厚嘅主僕情,外面唔多見,但Paco自己就有好多,佢對好多旗下藝人都係咁,特別係捧極都捧唔起嘅小肥、方力申、梁漢文等人,都係捧佢哋去到金牌大風嘅最後一刻,或者直到佢哋自己要轉公司。Paco捧紅嘅人好多,但最難得係對唔紅嘅藝人都一視同仁,淨係呢樣嘢,都抵佢人緣咁好。做人總係有恩有怨,呢一刻,恩遠遠大於怨,吳京可以捱到有今日,真係要多謝Paco,而唔係好似啲是非咁講,走去多謝甄子丹睇自己唔起囉。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場