【now.com娛樂】初初看到《拆彈專家》的拍攝，花數千萬搭條一比一的紅隧出來？不是嘛！然後看到他們的製作特輯，是真的！再看看預告片段，不就是我們日日返工放工那條紅隧嗎？似得這麼緊要！就是那股興奮，熱血得立即花$80入場看個究竟。結果，紅隧依然像真依然震撼，但那個劇本……不像樣喎，搞乜呀！
（內含嚴重劇透，慎入）
先簡單講講故事內容，劉德華飾演的拆彈專家，數年前做臥底滲入一個專門玩爆破的犯罪集團，最後雖然成功搗破，但主腦走甩了，然後數年後，他回來策劃一個驚天大陰謀，既要報復又要打劫政府，手段就是佔領紅隧！
火藥味十足吧，只不過情節上似乎承接不來。先講感情線，劉德華跟女主角宋佳的感情線，話來就來，情感爆發快過粒炸彈，然後突然又說承受不了男友那份搵命搏的工作，話散就散，到底想點？想寫出感情起伏，但又直上直落，與其篇幅不夠，倒不如刪掉去好吧！
然後到拆彈戲份，其中一幕講灣仔人民入境大樓外發現炸彈，是歹徒留給劉德華的考驗，這種雕蟲小技當然難不到華神，但原來這個炸彈只是前菜，還有一個跟隨，可惜時間無多，連劉華都冇把握即場拆掉，怎算？夠緊張吧！但點收科？結果就是姜皓文衝動地抱起炸彈跳上車，然後與劉華一起快駛到灣仔海邊，再一掉，「轟」海中爆炸，危機解除。香港海岸有多繁忙你知嘛，這樣的傷亡肯定會較少？
到重點戲，佔領紅隧挾持數百名市民，這個橋段很好，但總要有個理由解釋為何要佔領吧。結果原來是歹徒跟西隧老闆夾埋，佔領紅隧後，匪徒扮為民請命要回購西隧，從而令西隧股價飈升，而事前西隧老闆就買重自己公司股票，從中獲得巨利！其實要令自己公司股價大升，坊間有大把財技可從，而且仲合法冇手尾，真的有需要冒險做一場這樣的大龍鳳嗎？然後仲要分大份錢畀班賊，仲留下大量蛛絲馬跡被人跟到，通嗎？
又當你講得通，那麼這大班賊，為數幾十人，一齊守住條紅隧，跟隧道內的市民釀成困獸鬥格局，這設計很好，但最終可以點樣逃走呢？又畀3秒你諗諗……3、2、1。答案是安排直昇機離開！大佬呀，?家上到直昇機當你贏呀？香港冇空管嗎？香港有條法例，殺咗幾十條人命，只要上到直昇機就可以消遙法外，係咪睇得《賭神》多，以為天空就係公海，上到天空就無事呢？而大家又真係無辦法追蹤到你飛去邊呢？
最後最後，整個故事最荒謬但又可能最貼近現實的是，成班官員同警方，討論如何拯救人質時，口邊掛住要保護人質，但對白滲出的潛台詞是點樣先唔會被班賊引爆，破壞紅隧結構，否則重建一條要幾多千億，而揚起的塵土又要幾多個月先沉澱下來，嚴重影響生態等等，那麼人命呢？
就是束手無策。而最激氣係，劉德華最後也是因為保住條紅隧結構而犧牲！夠喇，真係夠喇，我都嫌自己成篇文太多「！」和「？」了。
數完一輪，其實都只想講一句，《拆彈專家》的確是一部很代表到香港的電影，就是只懂搞硬件，不懂做好軟件。正如政府要搞科研，起個科學園數碼港出來先啦，但怎樣配養科研人才，冇！要套戲夠話題，搭條紅隧出來炸啦，但怎樣寫好個劇本，好好去善用這個像真度極高的實景呢，冇！難道搭建一個實淨的故事結構比起紅隧更難？
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
