0
0
〈娛樂乜乜乜〉二次創作大晒?

〈娛樂乜乜乜〉二次創作大晒?

【now.com娛樂】台灣的谷阿莫終於被電影公司告,唔怕老實同大家講,我等咗呢個Moment好耐。無論告得成又好,告唔成都好,點都應該告一告,就用法律去話畀大家知,係唔係過癮好笑,多人鍾意睇,就可以完全無視版權?

我一開始都睇咗唔少谷阿莫嘅《X分鐘看完XX電影》系列,有啲係幾好笑嘅,但漸漸發現佢嘅評論穿插大量冇公開電影片段,即是套戲仲上緊,電影公司又冇剪落預告度,片段喺邊度嚟?答案呼之欲出啦,但我唔評論呢個來源,因為重點係嗰啲片段係電影公司所有,無論任何來源得返嚟,都唔應該喺電影上映期間或之前攞嚟用。呢個係行規,同時亦係Common Sense,更係好基本嘅道德操守,但發現呢啲基本尊重越少,佢就越受歡迎。佢走紅我唔覺得有乜問題,佢一定有自己受歡迎嘅個人特質,但對於版權被踐踏,個人感覺非常無奈。

都唔好淨係講台灣,香港都有唔少呢啲例子,例如一個好多人睇但我從來唔知佢點攞到啲片嚟用嘅網站,C字頭嘅,就成日用大量電影片段,重新剪接同配音,變成另一個故事。聞說呢個頻道係由一個新晉電影人主理,究竟佢哋用嘅片段有冇得到電影公司批准呢?可能佢有,但我睇唔到有Credit,咁冇Credit我就估佢冇啦,電影公司邊有咁好死(笑)?

其實都幾誇張,我第一次睇佢哋係剪咗《黑社會》做另一條搞笑片,條片成6分鐘,當時好奇怪點解銀河映像會咁識玩?後來問返先知唔關銀河事,係人哋自己攞嚟剪。之後陸續都有其他電影被所謂二次創作,但我相信,好多人覺得呢間C字頭其實係益緊啲電影公司,「唔係佢哋搵鬼人睇啦!」大把人咁諗,我感覺到呢個係一個潮流。

咁係咪我唔支持二次創作?唔係啊,我好支持,但二次創作條線從來都模糊,起碼都應該建基於兩點。第一係要有付出,難聽講句,而家谷阿莫同嗰間C字頭,邊有二次創作?頂盡咪1.5次!你話自己搵過批演員,拍過啲片,去扮返電影橋段甚至燈光鏡頭美術,都起碼係做過啲嘢,?家係直接攞人哋嘅嚟用,人哋出雞你出豉油,一個人剪接做埋配音就搞掂(嗱我冇話易做呀吓),然後話呢隻係自己隻雞,係咪要嬲呢?

你會問咁其他人改歌詞改圖又點計啊?一樣都係出豉油啫。答案就在第二點,你有冇用嚟賺錢呀?谷阿莫啲片放YouTube收緊幾多錢?C字頭你唔係以為係非牟利機構嘛?養緊一個Media喎!你改人張相嚟賺錢即係廣告硬照啦,你改人首歌賺錢即係廣告歌啦,都係要畀錢㗎!咁你改人套戲嚟賺錢點解會免費呢?若你相信呢個社會有收穫應該要有付出,若你認同二次創作不應成為不勞而獲嘅保護色,我覺得,冇理由唔認真同佢計一計。為真正嘅二次創作著想,有時塞返個漏洞都係一種捍衛。

台灣網絡紅人「谷阿莫」於Facebook上載影片,話自己遭到電影片商控告侵權。(Facebook影片截圖)
「谷阿莫」常以幽默方式製作短片,並起題為「X分鐘看完《XX》」,於網路上廣受歡迎。(YouTube網站截圖)

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    5小時前
  2. 迪士尼魔雪奇幻之旅 融合環保概念
    迪士尼魔雪奇幻之旅 融合環保概念
    1小時前
  3. 台灣素食店中毒死者驗出米酵菌酸 毒素全台首見
    台灣素食店中毒死者驗出米酵菌酸 毒素全台首見
    1小時前
  4. 東九文化中心「花海」亮燈 不再白茫茫一片
    東九文化中心「花海」亮燈 不再白茫茫一片
    1小時前
  5. 國足原主教練李鐵涉貪案一審 李鐵認罪悔罪法庭擇期宣判
    國足原主教練李鐵涉貪案一審 李鐵認罪悔罪法庭擇期宣判
    1小時前
  6. 日本進口瓶裝黑醋產品可能含懷疑有問題紅麴成分
    日本進口瓶裝黑醋產品可能含懷疑有問題紅麴成分
    2小時前
  7. 小米電動車上市 售價廿多三十萬人民幣
    小米電動車上市 售價廿多三十萬人民幣
    2小時前
  8. 《讓子彈飛》原著作者馬識途病逝 享年110歲
    《讓子彈飛》原著作者馬識途病逝 享年110歲
    3小時前
  9. 英王查理斯三世發表錄音講話 強調艱難時刻互相扶持重要性
    英王查理斯三世發表錄音講話 強調艱難時刻互相扶持重要性
    3小時前
  10. 曼谷機場網絡故障 香港快運兩班機延遲起飛
    曼谷機場網絡故障 香港快運兩班機延遲起飛
    3小時前