【now.com娛樂】郭富城大婚，足足成為連日來茶餘飯後的話題，由起初興奮祝賀高興談論，去到當晚開始指指點點指手劃腳，話題離不開新娘方媛（Moka）有沒有大肚？婚紗相怎麼要遮住腰間？外父外母甚麼模樣甚麼背景？新娘姊妹團如何以重鄉音地嗌Kiss⋯⋯
不過更多人談論的還是將新娘Moka，跟城城的各個前度作比較，熊黛林、苟云慧、鍾麗緹等名字都紛紛重現，說新娘不及誰靚、不及誰身材好、不及誰大方得體，千個萬個理由，都是想得出一個總結：都唔知點解要揀佢。
其實城城揀邊個，與我們何干，好好醜醜都是他老婆，有幾好有幾壞都是他來承受，我們都只是在食花生。大家要關心的，好可能是想求出一條方程式，好想知道一個平庸女子，如何能擊敗一眾高質對手，令一隻無腳雀仔甘願停下來跟她共諧連理。於是大家會從最直接最表面的條件入手觀察，看看她是否艷壓群芳，身材頂級。甚至不少人都認定是雙囍臨門，才令城城不得不娶她入門。
想得理所當然，又擠出多項力證去引證自己推測成立，但大家有否想過，一切都可能只是一個Timing問題。51歲前的郭富城，未有成家立室打算，所以就算有多好的女朋友在眼前，她都只能是女朋友，永遠只能站在黃線後等上車。但來到當下，這位遲熟的男人終於成長，突然心血來潮好想停下來，而且眼前的媽媽年事已高，做仔的突然生性，醒覺好想媽媽可以及時嚐杯新抱茶、抱抱孫。於是城城這刻中門大開，剛好身邊的正是方媛，就這樣，她便順理成章變為城嫂。大膽講句，熊黛林若願意等多兩年，她便守得雲開。如張敬軒《找對的人》歌詞︰「是對的 終於會碰到 是錯的 不管再美好」
答案有時就是這麼簡單，刻意去觀察分析，反而得出一堆偽數據。不要看輕Timing的影響力，有時即興是男人做任何事的原動力，包括結婚。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
