0
0
〈娛樂乜乜乜〉幸運夾雜著不幸

〈娛樂乜乜乜〉幸運夾雜著不幸

【now.com娛樂】《幸運是我》以票房論,應該唔多人睇過,難怪金像獎只得惠英紅攞獎成為話題,但整個頒獎禮其他部分幾乎都被冷待,都冇乜人為意,亦冇做到谷返起部戲口碑嘅效果。一樣係本土片,一樣係新導演,但同《樹大招風》、《一念無明》等有好大落差。

其實《幸運是我》係一部好有heart,但同時又好奇葩嘅電影。上映當時已經想寫,但有啲唔忍心寫得太直,喺原本已經唔會高嘅票房再踩多腳,心諗不如沉澱吓先啦,可能係自己睇唔開呢?但沉澱大半年後,到今日惠英紅攞埋金像獎,感覺依然冇變,套戲一樣好奇葩。

奇葩在電影完全地分裂,好嘅地方拍得極好,差嘅地方拍得極差,唔單止在質素上,更在表達手法同埋觀感上,有種好似兩個導演分開拍出嚟嘅感覺。但向好嘅地方睇,拍得好嘅多,差嘅少,但始終撈唔埋一齊。

電影最好嘅地方,金像獎已經頒咗個獎畀佢,就係小紅姐。其實個故仔好簡單,陳家樂阿媽死咗無依無靠,從廣州落香港搵拋棄佢嘅生父,落泊中遇到獨居老人惠英紅,仲租埋佢屋企間房住。後來陳家樂搵到老竇,但唔認佢,兩個同是天涯淪落人,一個人生目標都冇埋,另一個有腦退化症等待孤獨終老,日日都驚老來冇人照顧。唔可以講係一拍即合,但經時間磨合後,成為一段彷如再世母子嘅關係。

呢一Part好好睇,好睇到不得了,小紅姐固然做到外間對佢嘅高度評價,陳家樂都唔簡單,絕對係佢代表作。好多幕都好震撼,好似陳家樂帶走老竇另一頭家嘅細佬,想嚇一嚇佢,其實係搵存在感,點知到頭來同細佬產生感情,呢一幕好真實,比後來老竇兜口兜面話唔會認佢更真摰。又例如陳家樂見小紅姐屋企電視舊就變賣古董換部新電視返屋企,換來小紅姐歇斯底里嘅回應,腦退化嘅恐懼如海浪一波一波撲向陳家樂,你完全感受到佢嘅無助同擔憂,呢幕幾乎就係全部戲最有張力一場,勁在陳家樂接得住,唔易㗎,我幾肯定,換做余文樂就接唔住。

呢段哎吔母子情好睇在,電影只短短百幾分鐘,但拍得出細水長流。幾次嘅磨擦,然後接納,本來萍水相逢嘅兩個人,一齊生活漸漸如呼吸般自然。而電影差劣嘅地方就係在呢份自然之上,硬加插極端嘅突兀。話說劇情想交代陳家樂重新做人,安排一間社福機構同埋裡面一個靚女社工,畀佢重拾事業同愛情兩大生活元素。問題就在於反差太大,一邊係破舊唐樓中社會陰暗面,一邊係潔白無瑕前途一片光明嘅社福機構,如同最福音嘅福音電影拍法,仲要加個硬滑稽嘅大廚張繼聰。

電影就在現實與Surreal之間不斷穿插,一啖屎一啖朱古力,我身處兩者之間唔知自己食緊屎味嘅朱古力?定係朱古力味嘅屎?想分返開咩?佢又係同一部戲喎,以為係兩個導演分開拍咩?佢又係同一個導演拍出嚟。打個比喻,即是羅耀輝有份提名金像獎「新晉導演」,佢又同時有資格分裂另一個自己出嚟角逐金草莓。

我都唔想踩呢部戲,因為佢可愛嘅地方我極度鍾意,但你明唔明我嘅唔明啊?我唔明點解要咁處理啊!唔知要點樣打呢個圓場,寫完呢篇嘅心情,就好似當初睇完部戲時,嗰種時而驚喜過望,時而又扼腕嘆息,共冶一爐,又再重現。

《幸運是我》呢段哎吔母子情好睇在,電影只短短百幾分鐘,但拍得出細水長流。(電影圖片)
惠英紅戲中要演到80歲,故事中她的角色與她已故媽媽一樣患有腦退化症。(電影圖片)
不過加個硬滑稽嘅大廚張繼聰(左),令電影反差太大。(網上圖片)

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 迪士尼魔雪奇幻之旅 融合環保概念
    迪士尼魔雪奇幻之旅 融合環保概念
    5分鐘前
  2. 東九文化中心「花海」亮燈 不再白茫茫一片
    東九文化中心「花海」亮燈 不再白茫茫一片
    10分鐘前
  3. 國足原主教練李鐵涉貪案一審 李鐵認罪悔罪法庭擇期宣判
    國足原主教練李鐵涉貪案一審 李鐵認罪悔罪法庭擇期宣判
    35分鐘前
  4. 日本進口瓶裝黑醋產品可能含懷疑有問題紅麴成分
    日本進口瓶裝黑醋產品可能含懷疑有問題紅麴成分
    44分鐘前
  5. 小米電動車上市 售價廿多三十萬人民幣
    小米電動車上市 售價廿多三十萬人民幣
    52分鐘前
  6. 《讓子彈飛》原著作者馬識途病逝 享年110歲
    《讓子彈飛》原著作者馬識途病逝 享年110歲
    1小時前
  7. 英王查理斯三世發表錄音講話 強調艱難時刻互相扶持重要性
    英王查理斯三世發表錄音講話 強調艱難時刻互相扶持重要性
    1小時前
  8. 曼谷機場網絡故障 香港快運兩班機延遲起飛
    曼谷機場網絡故障 香港快運兩班機延遲起飛
    1小時前
  9. 哈薩克總統︰期待習近平7月國事訪問
    哈薩克總統︰期待習近平7月國事訪問
    2小時前
  10. 王仁華、肖天亮獲中央軍委晉升為上將
    王仁華、肖天亮獲中央軍委晉升為上將
    2小時前