【now.com】呢個世界邊有咁多奇蹟?777已成惡夢,本來想寫吓選舉,但發覺已冇嘢好講了,總之嚟緊五年有排捱。既然都要捱,我都係講返啲婆乸八卦嘢,輕輕鬆鬆做人算數。
咁,不如講吓成龍啦,呢個人口沒遮攔,諗到就講,乜都關佢事。例如台灣選總統「係咪笑話」、「天下男人會唔會犯錯」、「中國人要唔要管」、「電視機會唔會爆炸」等等問題,全部都關佢事。唯獨是,一啲私人嘢,例如同吳綺莉生個女,就同佢冇關一樣,唔知,唔理,唔答,真係好嘢呀。
即是佢個女,同佢個女個媽媽,搞到咁唔愉快,出現兩次重大家庭問題,要搞到上晒差館。上次就話個女被母虐打,搞完一輪冇咗件事;今次個女又報警,告阿媽刑事恐嚇,吳綺莉接受訪問時話,在個女間房搵到鎮靜劑,又話純粹因為鬧交所以個女報警,語氣重咗喎。外人真係唔知呢家人發生乜事,究竟係個女叛逆?定係阿媽真係飲酒吸毒?外人想關心都冇得過問。
但成龍係呢家人嘅爸爸,佢可以問呀!可以關心呀!佢其實可以拯救到呢兩母女,但最後選擇唔理。點都係自己骨肉吖,就算自己有正室,就算同吳綺莉冇感情,就算自己屋企個仔都未管得掂,就算真如陳年江湖傳聞所講已經一炮過畀咗三千萬擲煲費,嗰個都係佢個女呀!流住佢嘅血,有佢DNA㗎!點解可以咁狠心完全唔理,Show吓少少關心都唔得?點解呢?難道以為自己冇責任?
最唔忿氣係,早兩晚成龍出席晚宴,記者捉住佢問返件事,佢準備回應㗎喇,但又被何超瓊拉走做唔成,話會再出嚟又放飛機。點解要捉走佢啫,我真係想聽吓佢可以點答喎,成日唱「憑自我硬漢子」,形象就識做,兩個女人有事理都唔理吓,仲有面去評論世界大事。好打又有乜用?全世界都識你又點?所以點解我咁睇唔起成龍。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場