【now.com】特首選舉戰未到提名期，都已正式開戰，四位參選人各自磨拳擦掌，不計陪跑的何俊仁，今屆參選人比上屆多一倍，一下子由命中率由50%急跌至25%，風險之大真係未去到最後一刻都不敢落大注，於是在甚麼煙幕、甚麼真命天子的的言論下，大家都不敢妄下判斷，還是在這兩、三個月內睇定啲先。
要吸引人落自己注，當然要有表現，打基層牌扮親民是最萬試萬靈，想當日梁特都係靠一本筆記簿加張摺櫈，呃到不少Like，結果到最後一項承諾都冇兌現時，已經拜拜你條尾。所以眾人都看準這個殺著，紛紛下重藥。繼葉劉同胡官瞓劏房籠屋後，林鄭亦都踩足油，向呢片領土進發。
好明顯，所有落區和聽民意的工程，都係一部劇本，當事人要做的，就是按劇本對白去演，做好角色本份不斷點頭稱是，就已經可以準時收工拎飯盒。不過再好的劇本，都要演員肯配合先得，若然唔肯排戲又唔願記對白甚至玩爆肚，就真係王家衛執導都難救，因為這是Live，冇杜可風幫你剪得好好睇睇先出街的。於是乎不單止新科技的八達卡同不鏽鋼奶飲杯會令林太覺得驚奇，我們對她這份驚奇也深表驚奇。
以為再基層點，同大家講吓廁所用的廁紙，殊不知又再次露底，雖然不知道便利店冇廁紙賣不足為期，但你總可以買住幾包紙巾，或者盒裝紙巾頂住一天半晚吧！這再不是你有沒有留意民生的問題，而是你在執生和臨場應變上有冇問題？
演戲是講浸淫，有經過時間鍛鍊的演出，火喉一到，自能揮灑自如，看出分別。大家請看看莊思敏小姐，這兩天，就住一個來歷不明，不知真偽的「問價」短訊，就已經能自娛地妙問妙答，演了兩天獨腳戲，而且劇情有齊起承轉合，由最初話「100萬玩一夜」，到後來話不知誰有樣學樣，將價位開到「1000萬包夜」。來到這刻，莊思敏不單擺出氣極的樣子，還以自嘲形式笑言自覺不值這個價。
夠了嗎？未，去到昨日，莊思敏更有新點子，就是能為事件添上「新演員」，將妹妹莊思明也躋進劇本去，指又有網民問佢妹妹︰「可以花兩百萬找你玩嗎？」來到這刻，妹妹也該要有句對白吧！於是她在Instagram留言：「不好意思，我是用多少錢都買不到的，因為我不是一件玩具！」短短數天，完美演繹一場自己的水自己抽學問，在零成本的製作費下，演出一場堪稱美妙全神的華麗轉身，實在不得不寫個「服」字。
所以演戲這回事，劇本、角色、對白、走位等，都是學問，缺一不可。只要肯去苦心鑽研，假以時日定必可令人眼前一亮，幾位候選人，加油呀！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
