【now.com】這兩天，人人有如《賭城風雲III》片主一樣，久不久就上網check下賣飛情況，好想知道7點半得唔得？9點半呢？年廿九晚午夜場又點？不知幾咁肉緊！不過大家看的不是賣得好唔好，而係想知佢到底賣得有幾唔好！
正如一般賭片情節，網民今次就似跟王晶在賭檯上決一勝負，每用手機按下其中一個場次，就如獲荷官派發一張牌，一邊甩一邊捽，過往大嗌的三邊！電視機！今天變成綠色！綠色！由於座位表上每一點綠，就代表一個空位，若一片綠油油，就等於全場門票原封不動。眼科醫生常說多看綠色物件對眼睛有幫助，近日看到這片綠，不單眼睛舒服，就連身心都舒泰。
今天說勝利實在言之尚早，始終距離關鍵日子的年廿九及初一、二、三還有一段時間，難保仍然有為數不少的市民會買飛入場，況且已有政治團體包場支持，戰情實在有太多未知數。不過想說一點，大部分如王晶般的上一代「成功人士」，言論間往往都在矮化網民的力量。就如上年初，《賭城風雲II》上畫時也有團體呼籲罷睇，但結果行動不成，還被他冠以賀歲片票房冠軍之名，得戚至今。又如其老友陳百祥（阿叻），在2013年也向網民挑戰，說如果無線台慶收視剩下兩、三點，自己便由將軍澳跪地跪返屋企，結果又是花生無用武之地。
雖然屢敗的結果是屢戰，但至少大家在失敗中都有累積經驗，都在凝聚力量，所以在今次部署罷睇行動中，可見又比上年有系統得多。除了提早在網上作出宣傳，還製作各式各樣的金句圖去鼓動人心，又以台灣人齊心對抗黃安的例子喚醒眾人，更在多個送飛遊戲上發功，攻勢有如打游擊般無處不在。至於對手，還是處之泰然，以香港票房只是內地的25分1，不足為掛去應對。
到底網民可否一夜間晉身為賭神高進，擊敗老狐狸還要看下回分解，但以王晶的態度看，他早已是賭王陳金城上身，既認為後生仔始終係後生仔，都係急啲，仲自命掌握了高科技，看透了網民500舖敗績一無是處，沾沾自喜中。看來這場「紅綠陣營對決」，情節將會比任何一套賀歲片更精彩！更激烈！
話時話，剛才只是講了兩句《賭神》的情節，都已深深在回味。無可否認，你的確曾為香港拍出多部經典，本應是值得敬重的，何解來到今天，偏偏有高進不做要去做陳金城呢？啊！不是，應該是高義會更貼切。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
