【now.com】一年一度韓國音樂盛事Mnet Asia Music Awards 2015(MAMA)昨日於亞洲博覽館完滿結束,成為今日熱話的一定係獲得「年度藝人」的Big Bang及成為壓軸頒獎嘉賓的周潤發。但原來MAMA期間發生了一些小插曲,仲掀起網民罵戰。
MAMA昨晚超時近一小時,好多歌手都沒有坐全場,紛紛早走趕飛機,搞到發哥出場、Big Bang攞大獎及PSY壓軸表演嘅場面好冷清。太陽致詞時就有點感慨,話好可惜好多歌手都唔在場,希望下次可以同大家享受舞台。好多網民就批評早走嘅歌手唔尊重場合,唔理人感受。不過,亦有言論指離場歌手應該係有其他工作才會如此早走,相信Big Bang、PSY面對同樣情況都會一樣咁處理。
另一爭議點係2NE1全體亮相的驚喜表演,因為成員朴春之前涉毒,已經潛水近年半,今次可以隨大隊一齊亮相實在令人驚訝。然而為了避免不必要的議論,2NE1所屬的YG就強調朴春並未有復出計劃,昨日的演出只係送給粉絲的禮物。