0
0
〈娛樂乜乜乜〉知否 第六晚戀情

〈娛樂乜乜乜〉知否 第六晚戀情

【now.com】世界在變,過往藝人的戀情都主張收收埋埋,最佳例子係許志安與鄭秀文,單單是認與唔認,避談與默認,分手與復合再結埋婚,每個階段都係講吓又唔講,扭扭擰擰來來回回玩足廿年,最慘係大家又好受,好似睇《愛‧回家》咁,嫌人婆婆媽媽但又要追住睇。

不過時至今日,大家要求藝人多一份真。你仲想好似廿年前郭天王咁,向粉絲承諾自己30歲前唔失身?你唔介意當眾食生菜,我都嫌你食到「索索」聲嘈住晒啦!新一代藝人就如游學修和蘇麗珊,怕你估唔到佢哋會假戲真做上演真人版,男方索性在Instagram上,專登寫句:「你的夢?有我,我的夢?有你,就是幸福」然後成功觸動傳媒八卦神經,單刀直入問兩位是否想公開戀情?兩位90後亦大方承認在發展中,訪問期間仲要耍下花槍,一個讚對方男神一個話自己高攀唔起女神,坦白得甜蜜。

係咪年輕人的爽直,衝擊到郭富城早已消逝的純真感覺呢?同日,城城夜晚突然於微博公開自己戀愛中,還上載了一張與女子手牽著手的相,上面寫住「這樣開車要慢一點」。還未夠,仲要Tag埋女方名字「MK_fy」,十足十愛是全奉獻咁。然後經大家一查,證實女方是27歲的中國嫩模方媛。向來蛇咬都唔認的城城,即使跟上任正印熊黛林拍拖拍足七年,都可以大玩失憶諒解備忘錄。然而,回想起城城對上一次公開承認的戀情,已經是1999年在澳洲墮入的桃色陷阱,他聲稱付出真心卻遇上感情騙子,更有說被拍下影片遭勒索。由此可見,城城唔怕你條蛇有牙,最怕你條片有畫。結果唔夠半個鐘,又真係有傳媒公開他早前與方媛歡聚六日後,在送對方到機場時被記者拍下第六晚戀情的片段。

原來所謂公開戀情,只是一場危機處理。但話時話,片中城城的表現亦攞晒分,本來已經甩到身的他,見女友被記者圍堵,發出無助愛的呼喚時,城城此刻便從遠處單手插袋地英勇返回險地,一副有福同尋有禍願意分的英姿為愛人解圍,真係個個讚你佳。說到底,焗住撐好,真心救美都好啦,其實你都成50歲人,係粉絲都想你搵到真愛啦,使乜尷尷尬尬呢?不如學吓年輕人大方承認咪仲好。不過睇完條片,全世界最唔開心嘅應該係熊黛林。我七年時間換來一場空,你六日就搶灘成功?這樣開車真係要慢一點好喎。早知你咁怕鏡頭,我就應該學奪麵前輩咁玩好勝,call定記者樓下等,等大家拍到場真人Show,咁我不單可以贏番個名份,日後仲可以天天伴身邊望星啦!

文:余建

上載張合照,仲要寫句︰「你的夢?有我,我的夢?有你,就是幸福」無論係游學修定彭盛華,做事都係咁進取。
「人為妳鍾情/原諒我癡情/原諒我心急將心意傾~」
城城新歡係咁嘅樣。
最近有傳熊黛林聖誕嫁郭可盈胞弟郭可頌。

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

  1. 更多
  1. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    3小時前
  2. 哈薩克總統︰期待習近平7月國事訪問
    哈薩克總統︰期待習近平7月國事訪問
    43分鐘前
  3. 王仁華、肖天亮獲中央軍委晉升為上將
    王仁華、肖天亮獲中央軍委晉升為上將
    46分鐘前
  4. 國足原主教練李鐵涉貪案一審 李鐵認罪悔罪法庭擇期宣判
    國足原主教練李鐵涉貪案一審 李鐵認罪悔罪法庭擇期宣判
    48分鐘前
  5. 煥然懿居第三座售出近七成單位
    煥然懿居第三座售出近七成單位
    1小時前
  6. 小米首款電動車「SU7」標準版售價約22萬人民幣
    小米首款電動車「SU7」標準版售價約22萬人民幣
    1小時前
  7. 首爾巴士司機就加薪同資方達成共識 結束約半天的罷工
    首爾巴士司機就加薪同資方達成共識 結束約半天的罷工
    1小時前
  8. 東九文化中心三色花海亮燈 吸引市民觀賞
    東九文化中心三色花海亮燈 吸引市民觀賞
    1小時前
  9. 新一期綠置居即日起接受申請 申請者:看好香港、無信心怎會入市
    新一期綠置居即日起接受申請 申請者:看好香港、無信心怎會入市
    1小時前
  10. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    2小時前