【now.com】熊黛林(Lynn)近日跟韓國人氣節目《Running Man》的成員甚為有緣,繼早前跟金鐘國於內地遊戲節目合作後傳出緋聞,再與李光洙於假想情侶節目《如果愛》中被湊成一對,由於Lynn跟光洙同樣「高人一等」,所以被網民笑稱為「高海拔情侶」。
談到早前與金鐘國的合作,她跟對方在節目中不時手拖手上山下海逛超市,又到瀑布前拉筋齊齊做瑜珈,談到於一起煮飯的環節,Lynn大讚對方廚藝好:「我都幾喜歡識煮飯嘅男生,喺屋企煮飯仔幾sweet,有時會比出街食飯更開心。」不過Lynn隨即向金鐘國的女粉絲大派定心丸,她謂:「佢好照顧女嘉賓,我覺得佢對我好似照顧妹妹一樣,所以同佢一齊做節目都唔會有壓力,佢好有紳士風度,相信佢嘅fans唔會呷醋。」
至於與光洙於另一節目中被湊成一對,人稱「亞洲王子」的光洙在大中華地區人氣甚強,日前有大批fans在Lynn微博聲討,指她本身有男友,年紀又比光洙大,不配與光洙拍拖,留言求她放過偶像!不過Lynn就指對方的粉絲非但沒有呷醋,更叫她要多照顧光洙:「光洙嘅fans好乖,成日喺微博同我講光洙第一次拍中國節目,叫我多啲照顧佢,其實佢好照顧我先啱,佢係個大暖男,同佢做節目永遠冇悶場,希望我哋呢對銀幕情侶可以深入人心。」
近日正忙於拍攝《葉問3》的Lynn,對於與原有班底再聚首一堂,她表示今次跟子丹演夫妻更有默契,但今次戲份比以往兩集更多,令她增添了不少壓力:「有壓力但更多係鼓勵,多謝導演信任我,自己會更努力演好角色。」